CHADEMA WAIOMBA MAHAKAMA KUTUPILIA MBALI KESI YA ZITTO..

CHAMA cha Demokrasia na Maendeleo (CHADEMA) kimeomba Mahakama kutupilia mbali kesi ya madai, iliyofunguliwa na aliyekuwa Naibu Katibu Mkuu wa chama hicho, Zitto Kabwe dhidi yao kwa kuwa haina msingi kisheria. Walidai hayo katika pingamizi la awali, walilowasilisha juzi katika Mahakama Kuu Kanda ya Dar es Salaam, kupitia kwa mawakili wao, Peter Kibatala na Tundu Lissu.

Katika pingamizi lao, Chadema wanadai shauri halina msingi kwa kuwa halikufunguliwa katika Mahakama za chini zenye mamlaka ya kusikiliza na kutoa uamuzi kwa mujibu wa Sheria za mwenendo wa kesi za madai.

Kwa mujibu wa hati ya pingamizi hilo, Zitto anaendesha mashauri mawili dhidi ya Kamati Kuu ya Chadema kwa wakati mmoja, jambo ambalo ni matumizi mabaya ya Mahakama.

Wanadai, kesi hiyo imewasilishwa kwenye masijala Kuu ya Mahakama Kuu badala ya masijala ya Wilaya kinyume na taratibu za masijala za Mahakama na pia hajaomba maoni ya Mahakama Kuu kuhusu suala lake la uanachama.

Aidha, wanadai Mahakama Kuu siyo sehemu ya kushughulikia suala lake, bali Zitto alitakiwa kutumia nafasi nyingine zilizo ndani ya chama. Wanadai Mahakama haina mamlaka ya kutoa uamuzi wa ombi lake kwa Chadema kutoingilia uanachama wala ubunge wake, kwa kuwa itakuwa inaingilia mamlaka ya vyama vya siasa katika kuwaadhibu wanachama wake.

Zitto ambaye ni Mbunge wa Kigoma Kaskazini amefungua kesi ya madai dhidi ya Baraza la Wadhamini la Chama hicho na Katibu Mkuu, Dk Willbrod Slaa.

Katika kesi hiyo, anaiomba Mahakama itoe zuio kwa Kamati Kuu au chombo chochote ndani ya chama, kujadili suala la uanachama wake, hadi atakapokata rufaa ya kupinga uamuzi uliomvua uongozi wa chama.

Zitto anaiomba Mahakama imwamuru Katibu Mkuu wa Chadema, Dk Slaa ampe nakala zinazotoa sababu za uamuzi wa kumvua uongozi katika kikao kilichofanyika Novemba 22 mwaka jana, ili akate rufaa katika Baraza Kuu la Chama.

Aidha anaomba Mahakama iamuru Chadema isiingilie kazi zake za ubunge wala uanachama wake. Kesi hiyo namba moja ya mwaka huu itatajwa Februari 13 mwaka huu mbele ya Jaji John Utamwa.

Tayari Mahakama imetoa amri kwa Kamati Kuu ya chama hicho au chombo chochote cha Chadema, kutojadili suala la uanachama wa Zitto hadi kesi yake ya msingi aliyoifungua mahakamani, itakaposikilizwa.

Katika uamuzi wake, Jaji Utamwa alisema Zitto amekidhi matakwa ya kisheria, kwa kuwa zuio hilo lisipotolewa na akavuliwa uanachama bila kusikilizwa, atapoteza nafasi ya ubunge na kushindwa kuwatumikia wananchi waliomchagua ; na pia atap